Ոլոռով և մսով ապուր

Ոլոռով և մսով ապուր

Ողջույն, ընկերներ

Սիրտս էնպես ոլոռով ապուր ուզեց 😊 Երևի նրանից է, որ դեռ ցուրտ է, ու այսպիսի հագեցնող և յուղալի ապուրի ճիշտ ժամանակն է:

Բացի այդ՝ ոլոռը հայտնի է ոչ միայն իր համով, այլև՝ օգտակար հատկություններով: Այն պարունակում է A, B, և C վիտամիններ, հանքանյութեր և ամինաթթուներ:

Եվ այսպես, այսօր մեզ հարկավոր է.

Բաղադրիչները՝

Ոսկորով տավարի միս (մի քիչ յուղոտ) – 500 գր

Ջարդած ոլոռ՝ կանաչ կամ դեղին (горох) – 400 գր

Կարտոֆիլ – 2 հատ

Գազար – 1 հատ

Սոխ – 1 գլուխ

Լոլիկ – 1 հատ

Կծու կարմիր աղացած պղպեղ – մեկ պտղունց

Աղացած սև պղպեղ – ¼ թ. գդ.

Աղ՝ ըստ ճաշակի

Դափնու տերև - 2 հատ

Բուսայուղ – 1 ճ. գդ.

Կարագ – 30 գր.

Սամիթ և մաղադանոս – կես կապ

Ոլոռով և մսով ապուր

Պատրաստման եղանակը

Լվանում ենք ոլոռը, վրան տաք ջուր լցնում և թողնում ամբողջ գիշեր: Առավոտյան քամում ենք ջուրը:

Միսը լվանում ենք, սառը ջուր լցնում և եռացնում՝ փրփուրը հեռացնելով: Միսը եփում ենք ցածր կրակի վրա փակ կափարիչով՝ մինչ պատրաստ լինելը: Պատրաստ լինելուց 15 րոպե առաջ ավելացնում ենք աղն ու դափնու տերևը:

Հանում ենք միսն ու կտրատում: Արգանակը քամում ենք այն կաթսայի մեջ,որտեղ պետք է եփվի ապուրը, լցնում ենք ոլոռն ու եփում 30-35 րոպե:

Երբ ոլոռը գրեթե պատրաստ կլինի, ավելացնում ենք խորանարդաձև կտրատված կարտոֆիլն ու եփում մինչ բաղադրիչների լրիվ պատրաստ լինելը:

Ոլոռով և մսով ապուր

Հաջորդիվ մանր կտրատում ենք սոխը, քերիչով  անցկացնում ենք խոշոր գազարը: Դրանք միջին կրակի վրա տապակում ենք մինչ սոխը ոսկեգույն կդառնա, այնուհետև այս ամենը լցնում ենք ապուրի մեջ, ավելացնում ենք նաև մանրացված լոլիկը (դրա կեղև պետք է նախօրոք հանել) և միսը:

Համեմում ենք պղպեղով և, անհրաժեշտության դեպքում, աղով:

Եփում ենք ևս 5 րոպե, վերջին լցնում մանր կտրատված կանաչին և անջատում ենք կրակը:

Ահա և վերջ, թողնում ենք ապուրը մի փոքր թրմվի և արդեն կարող ենք մատուցել:

Ամենայն բարիք և բարի ախորժակ

Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:  

Այլ բաղադրատոմսերի համար անցեք հղումով:

Ինչպես նաև հետևեք մեզ Facebook-ում և Instagram-ում