Տորթ – աղցան սմբուկով և մսով

Տորթ - աղցան սմբուկով և մսով

Ողջույն ընկերներ

Այնքան համեղ ուտեստներ կարելի է պատրաստել, երբ ձեռքի տակ սմբուկ ունեք: Օրինակ՝ այսօր ուզում եմ ձեզ հետ կիսվել անսովոր բաղադրատոմսով. տոնական  տորթ-աղցան սմբուկով և մսով:

Անպայման պատրաստեք այս համեղ և կշտացնող աղցանն ու զարմացրեք ձեր հյուրերին:

Բաղադրիչները

Սմբուկ – 5 հատ

Աղացած տավարի միս – 500 գր.

Սոխ – 1 հատ

Համեմ – կես կապ

Քամած մածուն – 100 գր.

Թթվասեր – 100 գր.

Սխտոր – 1 պճեղ (ըստ ցանկության)

Աղացած սև պղպեղ – 1/3 թ. գդ.

Աղացած կարմիր պղպեղ – 1/3 թ. գդ.

Աղ՝ ըստ ճաշակի

Տորթ - աղցան սմբուկով և մսով

Պատրաստման եղանակը՝

Խորովում ենք չկլպած ամբողջական սմբուկները գազօջախի վրա կամ վառարանի մեջ:

Մաքրում ենք դրանք և մանր կտրատում:

Մանրացնում ենք սոխն ու բուսայուղի մեջ տապակում՝ մինչև թեթեև ոսկեգույն դառնալը:

Ավելացնում ենք տավարի ֆարշը, լցնում 100 մլ ջուր, լավ խառնում ենք , որ ֆարշը դառնա համասեռ, փակում ենք կափարիչն ու եփում մինչ պատրաստ լինելը՝ պարբերաբար խառնելով:

Ինչից հետո բացում ենք կափարիչը, շարունակում եփել մինչ հեղուկն ամբողջությամբ կգոլորշիանա: Վերջում համեմում ենք սև, կարմիր պղպեղներով և աղով:

Թողնում ենք, որ ֆարշը մի փոքր սառչի:

Թասի մեջ խառնում ենք քամած մածունն ու թթվասերը, 3-4 ճ. գդ ջուր լցնում, որպեսզի սոուսը շատ թանձր չստացվի, մի քիչ աղ անում և ավելացնում ճզմած սխտորը:

Իսկ հիմա հավաքենք աղցանը:

Դրա համար կօգտագործենք թխելու համար նախատեսված ֆորմայի շարժական բորտը. այդպես տորթ-աղցանի կողքերն իդեալական հարթ կստացվեն:

Առաջին շերտով դնում ենք կտրատված սմբուկը, համեմում այն: Երկրորդ շերտը աղացած միսն է, ապա սոուսը: Տորթի վերևի մասը զարդարում ենք մանր կտրատված համեմով:

Ահա և վերջ, աղցանը պատրաստ է:

Ամենայն բարիք և բարի ախորժակ:

Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:  

Այլ բաղադրատոմսերի համար անցեք հղումով:

Ինչպես նաև հետևեք մեզ Facebook-ում և Instagram-ում