Ռուլետ-թխվածքաբլիթ բեզեով, չորամրգերով և ընկույզով

Ռուլետ-թխվածքաբլիթ բեզեով, չորամրգերով և ընկույզով

Ողջույն ընկերներ,

Հյուրերի սպասելիս վերջապես որոշեցի պատրաստել այս թխվածքաբլիթը, որի բաղադրատոմսը չնայած վաղուղ ունեի, բայց ձեռքերս ոչ մի կերպ չէին հասնում դրան:

Պատրաստեցի և փոշմանեցի…որ այսքան ժամանակ հետաձգում էի այն թխելը ☺️

Թխվածքաբլիթը ստացվել էր շատ նուրբ ու համեղ. հյուրերս ուղղակի հիացած էին: Եվ, որ ամենակարևորն է իմ բաղադրատոմսերում, այն պատրաստվում է բավականին հեշտ ու արագ:

Դե ինչ, գնացինք

Բաղադրությունը

Խմորի համար

Ալյուր – 650 գր.

Կարագ – 250 գր.

Դեղնուց – 3 հատ

Թթվասեր – 350 գր.

Վանիլին – 0.5 թ. գդ.

Աղ – 1 պտղունց

Խմորի փխրեցուցիչ – 1 թ. գդ.

Միջուկի համար

Չորամրգեր (ցանկացած, ինձ մոտ ծիրան էր, սալոր, չամիչ և բալ) – 400 գր.

Ընկույզ – 200 գր.

Ձվի սպիտակուց – 3 հատ

Շաքարի փոշի – 180 գր.

Աղ – 1 պտղունց

Պատրաստման եղանակը

Սկզբում պատրաստում ենք խմորը:

Մեծ թասի մեջ մաղում ենք ալյուրը, ավելացնում սենյակային ջերմաստիճանի կարագը, տրորում ենք՝ վերածելով մանր փշուրների: Այնուհետև ավելացնում ենք պատառաքաղով մի փոքր հարված դեղնուցները, թթվասերը, աղը, վանիլինն ու փխրեցուցիչը:

Այս ամենը կարելի է խառնել ձեռքերով: Պետք է ստանանք փափուկ և նուրբ խմոր:

Փաթաթում ենք այն սննդային թաղանթով և դնում սառնարանը՝ 10-15 րոպեով:

Այդ ընթացքում զբաղվենք միջուկով:

Դանակով մանրացնում ենք չորամրգերն ու ընկույզը:

Հարիչով միջին արագությամբ հարում ենք սառնարանից  հանված սպիտակուցները՝ վրան ավելացնելով 1 պտղունց աղ. պետք է փարթամ փրփուր ստանանք: Այնուհետև աստիճանաբար ավելացնում ենք շաքարավազն ու շարունակում հարել՝ արդեն մաքսիմալ արագությամբ՝ մինչև կոշտ գագաթներ ստանալը:

Պատրաստի բեզեի մեջ լցնում ենք կտրատված չորամրգերն ու ընկույզը և գդալով զգուշորեն լավ խառնում: Վերջ, միջուկը պատրաստ է:

Խմորը հանում ենք սառնարանից և բաժանում 6 հավասար  մասերի: Յուրաքանչյուր մասը գրտնակում մենք ուղղանկյունի և միջուկը լցնում խմորի եզրով մեկ (մոտ 4-ական ճ. գդ.)՝ ինչպես ցույց է տրված նկարում:

Ռուլետ-թխվածքաբլիթ

Եթե խմորը կպնում է աշխատանքային մակերեսին, ապա դրա վրա մի փոքր ալյուր շաղ տվեք:

Անձամբ ես վրա բուսայուղ եմ քսում իմ աշխատանքային սեղանի վրա, որպեսզի խմորը չհագեցնեմ ավելորդ ալյուրով:

Մասերից յուրաքանչյուրը  զգուշորեն փաթաթում ենք ռուլետաձև:

Դրանք տեղափոխում ենք պերգամենտով ծածկված տապակի մեջ՝ իրարից մի փոքր հեռավորության վրա:

Սուր դանակի օգնությամբ կտրվածքներ ենք անում, բայց ոչ մինչև վերջ: Նայեք նկարին:

Ռուլետ-թխվածքաբլիթ

Ռուլետը թխում ենք 180° տաքացրած ջեռոցում՝ մինչև թեթև ոսկեգույն երանգը. մոտ 20-25 րոպե:

Հանում ենք ջեռոցից, թողնում մի փոքր սառչի և միայն հետո կտրվածքների տեղերով մասերի ենք բաժանում:

Ահա և վերջ, մեր համեղ ու անուշաբույր թխվածքը պատրաստ է:

Ամենայն բարիք և բարի ախորժակ

Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:  

Այլ բաղադրատոմսերի համար անցեք հղումով:

Ինչպես նաև հետևեք մեզ Facebook-ում և Instagram-ում