Պավլովա. համեղ, թեթև և գեղեցիկ
Պավլովա
Բարի օր, ընկերներ
Այսօր ես կկսիվեմ համեղ, թեթև և գեղեցիկ աղանդերի բաղադրատոմսով. տորթ Պավլովա:
Այն ստեղծվել է հարյուր տարի առաջ ավստրալացի հրուշակագործների կողմից՝ ի պատիվ ռուս մեծ բալերինա Աննա Պավլովայի:
Ձյունաճերմակ ամպի նմանվող այս նրբագույն խմորեղենը խորհրդանշում է բալետային պարազգեստ, թեթև է ու ոչ կալորիական՝ ինչպես պահանջում էր բալետի պարուհու դիետան:
Այս աղանդերը միշտ հավանել եմ, սակայն այն պատրաստելու համար հարմար առիթ չէր ստեղծվում:
Եվ միայն մի շատ լավ աղջկա՝ հրաշալի տանտիրուհու մոտ այն փորձելուց հետո որոշեցի ինքս պատրաստել:
Նախքան կանցնենք պատրաստման գործընթացին` ուզում եմ խոսել մի քանի կարևոր կանոնի մասին, որոնք պետք է պահպանել իդեալական արդյունք ստանալու համար:
Առաջինը՝ սպիտակուցները պետք է լինեն սառեցված. այդպես դրանք ավելի լավ են ծեփվում:
Սպիտակուցները դեղնուցներից առանձնացնելիս ուշադիր եղեք, որպեսզի դեղնուցի ոչ մի մասնիկ, նույնիսկ չնչին, չխառնվի սպիտակուցին, հակառակ դեպքում դրանք լավ չեն հարվի:
Տարան, որի մեջ հարելու եք բեզեն, պետք է լինի մաքուր և չոր:
Առատ, փարթամ փրփուր ստանալու համար ես միշտ սպիտակուցներին մի պտղունց աղ եմ ավելացնում:
Մեկ պտղունց աղ օգտագործեք առհասարակ ցանկացած աղանդեր պատրաստելիս, լինի դա կրեմի մեջ, թե խմորի, որովհետև աղը թույլ է տալիս համերին ավելի լավ բացվել:
Պավլովա
Բեզեն թխելիս ոչ մի դեպքում չբացեք ձեռոցը, եթե չեք ուզում, որ այն իջնի:
Ջեռոցն անջատելուց հետո անմիջապես մի հանեք տապակը. թույլ տվեք, որ բեզեն սառչի հենց ջեռոցում:
Եվս մեկ գաղտնիք. մերենգաները կրեմով և մրգերով լցրեք անմիջապես մատուցելուց առաջ, հակառակ դեպքում դրանք շատ արագ իրենց մեջ կքաշեն մրգային հյութը և կփափկեն:
Ցանկալի է խմորեղենն ուտել հենց պատրաստման օրը, քանի որ մյուս օրն այն արդեն համեղ չի լինում: Իսկ այ մերենգաները կարելի է թխել նախօրոք՝ ավելի շուտ պլանավորված հյուրասիրությունից մեկ օր առաջ:
Բեզեն կարելի է թխել ինչպես ամբողջական, այնպես էլ բաժիններով, ինչպես իմ դեպքում է, իսկ զարդարել կարող եք ցանկացած հատապտղով կամ մրգով, սակայն դասական է համարվում ելակի և մարակույայի համադրությունը:
Բաղադրիչները՝
Բեզեի համար
Ձվի սառեցված սպիտակուց - 4 հատՇաքարի փոշի - 180 գր.
Վանիլին` դանակի ծայրով
Սպիտակ գինու քացախ կամ կիտրոնի հյութ - 1 ճ. գդ.
Եգիպտացորենի օսլա - 2 ճ. գդ.
Կրեմի համար
Սերուցք՝ 33% յուղայնությամբ - 200 գր.
Մասկարպոնե պանիր - 250 գր.
Շաքարի փոշի - 2 ճ. գդ.
Զարդարելու համար
Ցանկացած հատապտուղ՝ ձեր ճաշակով
Պատրաստման եղանակը
Ձեռոցը տաքացրեք 160°: Չմոռանաք տապակը հանել, որպեսզի այն չտաքանա:
Հարեք սպիտակուցները՝ մինչև դրանցից կոշտ գագաթներ ստանալը: Պետք է սկսել հարել ցածր արագությամբ և այն աստիճանաբար դարձնել մաքսիմալ:
Երբ սպիտակուցները հեղուկ վիճակից կվերածվեն փափուկ փրփուրի, առանց հարիչն անջատելու գդալով՝ փոքր բաժիններով ավելացրեք շաքարի փոշին և շարունակեք հարել:
Սպիտակուցային զանգվածին ավելացրեք եգիպտացորենի օսլան, վանիլինն ու քացախը կամ կիտրոնի հյութը:
Զգույշ, ոչ ինտենսիվ խառնում ենք խմորը:
Տապակը ծածկում ենք պերգամենտով. պետք չէ վերջինիս վրա յուղ քսել:
Ստացված բեզեն լցնում ենք խոհարարական պարկի մեջ և դրա օգնությամբ նույնանման զամբյուղներ ենք ստանում:
Ես մոռացա այս փուլը նկարեմ, որպեսզի ցույց տամ, թե ինչ տեսք պետք է ունենան զամբյուղները, այդ իսկ պատճառով տեղադրում եմ համացանցից ներբեռնված նկար ☺️
Կորժը մոտ 5 րոպե թխում ենք 160° ջերմաստիճանի տակ, որպեսզի բեզեի վրա խրթխրթան կեղև առաջանա: Ինչից հետո իջեցնում ենք ջերմաստիճանը մինչև 100° և թխում մոտ 30-40 րոպե:
Անջատեք ջեռոցն ու թողեք, որ բեզեն հենց այնտեղ էլ սառչի:
Կրեմի համար հարեք սառեցված սերուցքը մինչև նուրբ գագաթներ ստանալը՝ աստիճանաբար ավելացնելով շաքարի փոշին:
Ինչից հետո հարված սերուցքին ավելացնում ենք մասկարպոնեն, հարում ևս մի քանի վայրկյան և վերջ, կրեմը պատրաստ է:
Զամբյուղները լցնում ենք կրեմով և զարդարում հատապտուղներով:Ահա և վերջ, աղանդերը պատրաստ է և կարող ենք այն մատուցել:
Ամենանայն բարիք և բարի ախորժակ:
Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:
Այլ բաղադրատոմսերի համար անցեք հղումով:
Այս բաժնում տեղ գտած մտքերն ու տեսակետները հեղինակի սեփականությունն են և կարող են չհամընկնել Kisvir.am հարթակի ադմինիստրացիայի տեսակետների հետ
Կարող եք դիտել նաև
[quads id=7]
Stay connected