Պասուց տոլմա՝ յուրահատուկ և օրիգինալ բաղադրատոմսով
Պասուց տոլմա
Ողջույն ընկերներ
Շարունակելով պասային բաղադրատոմսերի թեման՝ առաջարկում եմ պատրաստել հայկական խոհանոցի ամենավանդական պասային ուտեստը՝ պասուց տոլման, սակայն ոչ հայտնի և տարածված, այլ իմ օրգինալ մեկնաբանությամբ:
Եվ այսպես, սկսենք:
Բաղադրությունը՝
Բրինձ - 350 գր.
Ոսպ - 300 գր.
Չամիչ (ցանկացած) - 250 գր.
Սոխ - 2 մեծ գլուխ
Խաղողի տերև
Չորացրած կանաչեղեն՝անանուխ, ուրց (чабрец), ռեհան, ծիտորն - 2-ական թ. գդ.
Չորամրգեր՝ սալոր կամ ծիրան - 1 բուռ
Բուսայուղ - 300 գր.
Աղ՝ ըստ ճաշակի
Կարմիր կծու պղպեղ՝ ըստ ցանկության
Պատրաստման եղանակը
Լավ լվանում ենք բրինձն ու ոսպը (ջուրը մի քանի անգամ փոխելով):
Դնում ենք եփվելու՝ հասցնելով կիսաեփ վիճակի: Քամում ենք ջուրն ու լցնում մեծ թասի մեջ:
Սոխը կտրատում ենք խորանարդաձև ու տապակում բուսայուղի մեջ՝ մինչև թեթև ոսկեգույն դառնալը: Ավելացնում ենք չորացրած կանաչեղենը, աղն ու պղպեղը, և այն լցնում բրձի ու ոսպի վրա: Այստեղ ավելացնում ենք նաև լվացած և քամված չամիչը:
Զանգվածը լավ խառնում ենք, որպեսզի բոլոր համերն ամուսնանան ☺️
Խաղողի տերևները վաճառվում են արդեն մարինացված՝ այսինքն դրանք փափուկ են, այնպես որ պետք է պարզապես դրանք լվանալ հոսող ջրով և դնել քամիչի մեջ:
Բայց եթե տերևները կոշտ են, ապա դրանք պետք է 10 րոպե եփել:
Պասուց տոլմա
Ֆարշը փաթաթում ենք տերևների մեջ (տերևները դնում ենք հարթ կողմով ներքև):
Կարծում եմ՝ այս պրոցեսը շատ լավ ծանոթ է բոլոր տանտիկիններին, երկար բացատրելու կարիք չկա, ուղղակի ասեմ, որ տոլման պետք է ավելի մեծ լինի, քան մսովը, դրա համար եթե տերևները մեծ են, փաթաթելուց վերցնում ենք 2-ական, իսկ եթե փոքր՝ 3-4 - ական:
Փաթաթված տոլմաները շարում ենք կաթսայի մեջ՝ չմոռանալվ շարքերի արանքում լցնել չորամրգերը:
Ջուրը լցնում ենք այնպես, որ այն մի փոքր ծածկի տոլմայի վերևի շարքին:
Վերևից դնում ենք ափսեն, որպեսզի եռալու ընթացքում տոլման լինի սեղմված. հակառակ դեպքում տերևները կարող են բացվել:
Եռման աստիճանի հասցնում ենք միջին կրակի վրա, այնուհետև կրակն իջեցնում և եփում արդեն թույլ կրակով մոտ մեկ ժամ:
Պատրաստ լինելուն պես կրակն անջատում ենք ու տոլմային ձեռք չենք տալիս՝ մինչև սառչելը:
Ահա և վերջ
Հաջողություն և բարի ախորժակ
Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:
Այլ բաղադրատոմսերի համար անցեք հղումով:
Ինչպես նաև հետևեք մեզ Facebook-ում և Instagram-ում
Այս բաժնում տեղ գտած մտքերն ու տեսակետները հեղինակի սեփականությունն են և կարող են չհամընկնել Kisvir.am հարթակի ադմինիստրացիայի տեսակետների հետ
Կարող եք դիտել նաև
[quads id=7]
Stay connected