Պանրային մուս կոնյակով և խաղողով
Պանրային մուս կոնյակով և խաղողով
Ողջույն ընկերներ
Այսօր կիսվելու եմ ֆանտաստիկ, պարզապես աներևակայելի համեղ և օրիգինալ նախուտեստի բաղադրատոմսով, որն արժանի է ընդգրկվել ռեստորանային մենյուում, բայց կարելի է հեշտությամբ պատրաստել տանը՝ ձեր իսկ խոհանոցում:
Սկզբնական բաղադրատոմսում այն պատրաստում են խաղողով, բայց հիմա հատապտուղների սեզոն է, հետևաբար մեծ մեղք կլիներ առիթից չօգտվելը ☺️
Այնպես որ ես համարձակորեն խաղողը փոխարինեցի հաղարջով:
Նախուտեստում շատ հարմար կլինի օգտագործել նաև բալ, սակայն այն պետք է քամել ավելորդ հեղուկից ազատվելու համար:
Իմիջայլոց, եթե չեք սիրում կապույտ պանիր, կարող եք այն պարզապես չօգտագործել:
Պանրային մուս կոնյակով և խաղողով
Բաղադրիչները
Տարբեր գույների խաղող – 350 գր.
Կոնյակ – 100 մլ.
Կաթնաշոռային պանիր – 300 գր. (ինձ մոտ «Almette» է)
Կապույտ պանիր (Ռոքֆոր կամ Դորբլյու) – 50 գր.
Թթվասեր 20 % յուղայնությամբ – 100 գր.
Կարագ – 50 գր.
Մեղր – 1 ճ. գդ.
1 կիտրոնի ցեդրա
Կեղևը մաքրած նուշ – 30 գր. (կարելի է նաև թեթև տապակած ընկույզ)
Ժելատին – 10 գր.
Պատրաստման եղանակը
Պետք է նախօրոք պատրաստել խաղողը:
Դրա համար այն պետք է ատամի փայտիկով կամ ասեղով ծակծկել մի քանի տեղից, դասավորել թասի մեջ և վրան կոնյակ լցնել:
Թասը կափարիչով փակում ենք և 2 օրով դնում սառնարանը, որպեսզի խաղողը թրմվի:
Պանրային մուս կոնյակով և խաղողով
Նուշը 10 րոպեով թրջում ենք եռացած ջրի մեջ, ինչից հետո հանում ենք կեղևը (այն հեշտությամբ դուրս է գալիս), չորացնում ենք և մանրացնում:
Ժելատինի վրա լցնում ենք 50 մլ եռացրած-սառեցրած ջուր և թողնում ենք 20 րոպե, որպեսզի այն ուռչի:
Խաղողը քամիչով քամում ենք: Կոնյակը լցնում ենք փոքրիկ կաթսայի մեջ և լավ տաքացնում ենք այն, բայց չենք եռացնում:
Խաղողի հատիկները երկու մասի ենք բաժանում, հեռացնում ենք կորիզները:
Խոհանոցային կոմբայնում հարում ենք փափկեցրած կարագը, թթվասերը, կաթնաշոռային պանիրը, Դորբլյու պանիրն ու մեղրը:
Ավելացնում ենք մանրեցրած նուշն ու կիտրոնի ցեդրան, լավ հարում ևս մեկ անգամ:
Ժելատինը գոլորշու վրա հալեցնում ենք հեղուկ վիճակի և լցնում տաք կոնյակի մեջ: Թողնում ենք, որ այն մի փոքր սառչի ու լցնում ենք պանրային զանգվածի վրա:
Լավ խառնում ենք, ինչից հետո ավելացնում ենք կտրատված խաղողը:
Զանգվածը ջրիկ կդառնա, բայց մի անհանգստացեք, սառնարանում այն պնդանալու է:
Պանրային մուս կոնյակով և խաղողով
Պանրային զանգվածը լցնում ենք բաժակների կամ գավաթների մեջ, ծածկում սննդային թաղանթով և թողնում սառնարանում մինիմում 6 ժամ, նախընտրելի է ամբողջ գիշեր:
Խորհուրդ. Եթե սեղանին այլ նախուտեստներ էլ են լինելու, ապա պանրային մուսը լցրեք փոքր գավաթների մեջ, որպեսզի փոքր բաժինները ստացվեն և հյուրերը չհագենան միայն այս մուսով ☺️
Կարող եք զարդարել կտրատված խաղողի գիլաներով, ընկույզով և կիտրոնի ցեդրայով:
Ամենայն բարիք և բարի ախորժակ
Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:
Այլ բաղադրատոմսերի համար անցեք հղումով:
Ինչպես նաև հետևեք մեզ Facebook-ում և Instagram-ում
Այս բաժնում տեղ գտած մտքերն ու տեսակետները հեղինակի սեփականությունն են և կարող են չհամընկնել Kisvir.am հարթակի ադմինիստրացիայի տեսակետների հետ
Կարող եք դիտել նաև
[quads id=7]
Stay connected