Օրիգինալ թեթև աղցան տապակած պանրով

Ողջույն ընկերներ

Այսօր կկիսվեմ ձեզ հետ ևս մեկ թեթև ամառային աղցանի բաղադրատոմսով: Չնայած նրան, որ աղցանը շատ պարզ է պատրաստվում, նրա համն ամենևին էլ պարզ չէ, այլ հարուստ է ու հետաքրքիր:

Օրիգինալ բաղադրատոմսում օգտագործվում է Հալումի պանիր, բայց, ցավոք սրտի, մեզ մոտ այն այնքան էլ հեշտ չէ գտնել:

Ես պատահաբար հայտնաբերեցի «Մարիաննա» ընկերության պանիրը. այն տուփի մեջ է և կոչվում է « պանիր տապակելու համար »: Փորձեցի ու ինձ շատ դուր եկավ, քանի որ տապակելիս պանիրը չի հալչում և չի կորցնում իր ձևը:

 

Եվ այսպես, մեզ պետք կգա

Օրիգինալ թեթև աղցան տապակած պանրով

Բաղադրիչները՝

Ռուկոլա – 1 տուփ

Չերի լոլիկ – 6-7 հատ

Ելակ – 200 գր.

Տապակելու համաի պանիր «Մարիաննա» - 200 գր.

Թանձրուկի համար

Մեղր – 1 թ. գդ.

Հատիկավոր մանանեխ – 1 թ. գդ.

Ձիթայուղ – 2 ճ. գդ.

Օրեգանո – 1/3 թ. գդ.

Բալզամիկ քացախ - 1 ճ. գդ.

Աղ՝ ըստ ճաշակի

 

Օրիգինալ թեթև աղցան տապակած պանրով

Պատրաստման եղանակը

Նախ պատրաստում ենք թանձրուկը.

միախառնում ենք բոլոր բաղադրիչները, լցնում ռուկոլայի վրա և խառնում:

Ռուկոլան տեղափոխում ենք մատուցման ափսեի մեջ, ավելացնում երկու մասի բաժանված չերի լոլիկներն ու ելակը:

Պանիրը կտրատում ենք շերտերով, երկու կողմից տապակում մի փոքր բուսայուղով (ինձ մոտ գրիլի տապակ է. այդպես ավելի գեղեցիկ է ստացվում):

Այնուհետև պանիրը տեղափոխում ենք աղցանի վրա: Կարող ենք զարդարել բալզամիկ տոպինգով:

Վերջ, մեր օրիգինալ աղցանը պատրաստ է:

 

Ամենայն բարիք և բարի ախորժակ


 

Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:  

Այլ բաղադրատոմսերի համար անցեք հղումով:

Ինչպես նաև հետևեք մեզ Facebook-ում և Instagram-ում

  Բարի ախորժակ