Մերենգային ռուլետ ազնվամորու կուլիով
Մերենգային ռուլետ ազնվամորու կուլիով
Ողջույն ընկերներ
Թեթև, նուրբ, եթերային, նրբաճաշակ, համեղ… մտածում եք՝ ի՞նչի մասին եմ խոսում:
Իսկ ես խոսում եմ մերենգային ռուլետի մասին, որն էլ այսօր պատրաստելու ենք. այն իսկապես հրաշալի է:
Իրականում ռուլետը պատրսատելը բարդ չէ, և եթե հետևեք որոշակի կանոնների, որոնց մասին ես ընթացքում կխոսեմ, այն ձեզ մոտ կստացվի առաջին անգամից:
Եվ այսպես, մեզ հարկավոր է.
Բաղադրիչները՝
Մերենգայի համար
Ձվի սպիտակուց – 6 հատ
Շաքարավազ – 200 գր.
Լիմոնի աղ – մեկ պտղունց
Աղ – մեկ պտղունց
Եգիպտացորենի օսլա – 25 գր.
Կրեմի համար
Կաթնաշոռային պանիր – 250 գր.
Սերուցք 33-36% - 100մլ
Շաքարի փոշի – 40 գր. (2 ճ. գդ.)
Վանիլին – դանակի ծայրով
Հատապտղային կուլիի համար
Ազնվամորի (կամ ցանկացած այլ հատապտուղ) – 200 գր.
Շաքարավազ – 50 գր.
Եգիպտացորենի օսլա – 1 ճ. գդ.
Ջուր – 3-4 ճ. գդ.
Մերենգային ռուլետ ազնվամորու կուլիով
Պատրաստման եղանակը
Նախ պատրաստենք ազնվամորու կուլին, քանի որ այն պետք է հասցնի լավ սառչել այն պահին, երբ արդեն պատրաստ կլինի մերենգային կորժը:
Շաքարավազն ու ազնվամորին լցնում ենք կաթսայի մեջ, դնում միջին կրակի վրա և եփում մոտ կես րոպե: Ինչից հետո ացելացնում ենք սառը ջրում բացած օսլան և եփում մինչ թանձրանալը (դա կտևի 2-3 րոպե): Մի կողմ ենք դնում, որ սառչի:
Անցնենք բեզեյի պատրաստմանը
Ձուն սառնարանից հանելուց անմիջապես հետո սպիտակուցներն առանձնացնում ենք դեղնուցներից:
Կանոն համար մեկ. դեղնուցից ոչ մի կաթիլ չպետք է խառնվի սպիտակուցին, հակառակ դեպքում այն հարելիս չենք ստանա կայուն բեզե:
Կանոն համար երկուս. հարելուց առաջ սպիտակուցները պետք է կես ժամ մնան սենյակային ջերմաստիճանում: Այսպես դրանց կոնսիստենցիան ավելի փափուկ է դառնում, և սպիտակուցները հարվելիս հեշտությամբ հագենում են թթվածնով և, հետևաբար, ավելի փքուն են դառնում:
Սպիտակուցները լցնում ենք հարիչի տարայի մեջ:
Կանոն համար երեք. հետևեք, որ սպասքը լինի ամբողջովին չոր և մաքուր:
Ավելացնում ենք աղն ու լիմոնի աղը և միքսերով հարում միջին արագությամբ: Մի քանի րոպեից, երբ կսկսի առաջանալ փրփուրը, արագությունը դարձնում ենք մաքսիմալ և շարունակում հարել՝ ընթացքում ավելացնելով մեկական գդալ շաքարավազ:
Հարում ենք մինչ կոշտ գագաթներ ստանալը: Վերջում ավելացնում ենք օսլան և խառնում միքսերով:
Ջեռոցի տապակը ծածկում ենք պերգամենտով կամ, եթե ունեք թխելու համար նախատեսված սիլիկոնե գորգ, դա օգտագործեք:
Լցնում ենք մերենգան հավասար հարթ շերտով (վրան կարող եք նուշի թերթիկներ շաղ տալ) և ուղարկում ենք նախապես մինչ 160° տաքացրած ջեռոցը (ռեժիմը՝ վերև-ներքև) 25-30 րոպեով:
Մերենգային ռուլետ ազնվամորու կուլիով
Պատրաստի մերենգան շուռ ենք տալիս չոր մաքուր մակերեսի վրա, օրինակ՝ պերգամենտի կամ սիլիկոնե գորգի, թողնում ենք մի փոքր սառչի և զգուշորեն հեռացնում պերգամենտը:
Մինչ մերենգան թխվում է, պատրաստենք կրեմը.
Հարում ենք սառը սերուցքը՝ մինչ կայուն գագաթներ ստանալը, ավելացնոմ ենք կաթնաշոռային պանիրը, շաքարի փոշին և վանիլինը: Հարում ենք ևս 30 վայրկյան:
Կրեմը քսում ենք մերենգայի վրա: Հետևեք, որ կրեմի շերտը ստացվի հավասար և ոչ շատ հաստ՝ 2-3 մմ_ից ոչ ավել:
Կրեմի վրա հավասար շերտով քսում ենք ազնվամորու կուլին (վրան կարող ենք հատապտուղներ շաղ տալ) և կորժը զգուշորեն փաթաթում ռուլետի ֆորմայով:
Ստացված ռուլետը փաթաթում ենք պերգամենտով կամ թղթով և մի քանի ժամով դնում սառնարանը:
Այն կարելի է զարդարել հատապտուղներով և անանուխի տերևներով:
Վուալյա, մնաց համտեսել
Բարի ախորժակ և ամենայն բարիք
Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:
Այլ բաղադրատոմսերի համար անցեք հղումով:
Ինչպես նաև հետևեք մեզ Facebook-ում և Instagram-ում
Այս բաժնում տեղ գտած մտքերն ու տեսակետները հեղինակի սեփականությունն են և կարող են չհամընկնել Kisvir.am հարթակի ադմինիստրացիայի տեսակետների հետ
Կարող եք դիտել նաև
[quads id=7]
Stay connected