Հավի բդիկներ մոցարելլայով

Հավի բդիկներ մոցարելլայով

Ողջույն ընկերներ

Այսօր մենք պատրաստելու ենք շատ օրիգինալ, համեղ ու հեշտ ուտեստ՝ հավի բդիկներ մոցարելլայով և եգիպտացորենով:

Դուք կարող եք վերցնել հավի ցանկացած մաս, որը սիրում եք՝ բդիկի ներքի մասը, թևիկներ և նույնիսկ կրծքամիս:

Այս ուտեստի մեջ գլխավորն օրիգինալ մարինադն է և սոուսը, որոնք էլ մսին յուրահատուկ բույր ու պիկանտ համ են փոխանցում, իսկ հալված մոցարելլայի հետ համադրությամբ ուտեստը յուրատեսակ շուք է ձեռք բերում:

Եվս մեկ պահ. ես ուտեստը պատրաստեցի եգիպտացորենով, բայց հասկացա, որ շատ հանգիստ կարելի է և այն չօգտագործել:

Եվ այսպես, մեզ պետք է.

Հավի բդիկներ մոցարելլայով

Բաղադրիչները`

Հավի բդիկների վերևի հատված – 3 հատ

Մոցարելլա – 200 գր.

Թարմ խաշած կամ պահածոյացված եգիպտացորեն – 1 ճ. գդ.

Մարինադի համար

Կարրի փոշի - 1 ճ. գդ.

Մանրացված սխտոր կամ սխտորի փոշի – 1 ճ. գդ.

Աղ – 1 թ. գդ.

Կոճապղպեղի փոշի – 1 թ. գդ.

Աղացած սև պղպեղ – 1 թ. գդ.

Օրեգանո – 1 թ. գդ.

Կաթ – 350 մլ

Բարբեքյու սոուս

Չիլի փոշի – 1 թ. գդ.

Սոյայի սոուս – 1 ճ. գդ.

Չոր սպիտակ գինի – 2 ճ. գդ.

Մեղր - 1 ճ. գդ.

Կետչուպ – 2 ճ. գդ.

Կոճապղպեղի փոշի – 1 թ. գդ.

Աղացած սև պղպեղ – 1 թ. գդ.

Սխտորի ջուր – 5 ճ. գդ.

Սխտորի ջուր

Մանրացված սխտոր – 1 ճ. գդ.

Ջուր – 5 ճ. գդ.

Հավի բդիկներ մոցարելլայով

Պատրաստման եղանակը

Լվանում ենք հավի բդիկները, չորացնում թղթե սրբիչով և կտրում երկու մասի: (Կարելի է հեռացնել ոսկորը):

Բդիկները դնում ենք տարայի մեջ, ավելացնում ենք մարինադի համար նախատեսված չոր բաղադրիչները, լցնում ենք կաթն ու լավ խառնում:

Փակում ենք կափարիչով և ամբողջ գիշեր թողնում սառնարանում:

Պատրաստում ենք սխտորի ջուրը.

Ճզմում ենք սխտորը, ավելացնում ջուրը և թողնում 30 րոպե: Այնուհետև անցկացնում ենք մաղի միջով. մեզ պետք է գալու միայն հեղուկը:

Սխտորի ջրին ավելացնում ենք բարբեքյու սոուսի համար նախատեսված բոլոր բաղադրիչները՝ բացառությամբ աղացած սև պղպեղի, և խառնում ենք:

Սոուսը լցնում ենք տապակի մեջ և եփում ենք մարմանդ կրակի վրա 6-7 րոպե (սոուսը պետք է թանձրանա): Վերջում ավելացնում ենք սև պղպեղը:

Միսը հանում ենք մարինադի միջից և դնում քամիչի վրա՝ ավելորդ հեղուկից ազատվելու համար:

Բդիկները դնում ենք ջեռոցի ցանցի վրա, իսկ ցանցի ներքևում՝ տապակ ենք տեղադրում, որպեսզի յուղը դրա վրա կաթա:

Բդիկները տեղափոխում ենք նախապես 200° տաքացրած ջեռոցը՝  30-35 րոպեով: Երբ միսը մի կողմից կարմրում է, շուռ ենք տալիս և թողնում ևս 10-15 րոպե:

Պատրաստի բդիկները դնում ենք ափսեի մեջ և երկու կողմից քսում մեր բարբեքյու սոուսը (ավելի հարմար կլինի դա անել խոհանոցային վրձինով):

Մաքուր տապակի վրա լցնում ենք քերած մոցարելլան, այնուհետև՝ եգիպտացորենը, վրան՝ շարում բդիկները: Տապակը դնում ենք թույլ կրակին և հալեցնում պանիրը:

Պատրաստի ուտեսը պետք է անմիջապես մատուցել՝ հենց տապակի մեջ, քանի դեռ մոցարելլան հալված է:

Պարզ և անչափ համեղ

Ամենայն բարիք և բարի ախորժակ

Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:  

Այլ բաղադրատոմսերի համար անցեք հղումով:

Ինչպես նաև հետևեք մեզ Facebook-ում և Instagram-ում