Արանչինի մոցարելլայով

Արանչինի մոցարելլայով

Ողջույն ընկերներ

Այսօր պատրաստում ենք իտալական խոհանոցի դասական ուտեստներից մեկը՝ արանչինի: Ի դեպ, ես ասե՞լ եմ, որ իտալական խոհանոցն իմ ամենասիրելիներից է!!! 😊

Արանչինին սիցիլիական խոհանոցի հպարտությունն է:

Այն հագեցած նարնջագույն բրնձի գնդիկ է՝ նման փոքր նարնջի: Այստեղից էլ հենց անունը. նարինջն իտալերեն՝ arancia:

Արանչինիի միջուկը կարող է շատ տարբեր լինել. այսօր ես այն կպատրաստեմ մոցարելլա պանրով:

Այսպիսով, մեզ պետք է.

Բաղադրիչները

Արբորիո բրինձ – 250 գր.

Քրքում – 1/3 թ. գդ.

Պաքսիմատ – 100 գր.

Պարմեզան – 50 գր.

Ձու – 3 հատ

Ալյուր – 100 գր.

Կարագ – 50 գր.

Աղ՝ ըստ ճաշակի

Մոցարելլա

Բուսայուղ – 200 մլ. (տապակելու համար)

Ջուր – 750 մլ.

Արանչինի մոցարելլայով

Պատրաստման եղանակը.

Աղ արված եռացող ջրի մեջ լցնում ենք Արբորիո բրինձը: Խառնելով եփում ենք՝ մինչև հեղուկի գոլորշիանալը: 

Եփելուց 10 րոպե առաջ, երբ ջուրը դեռ ամբողջությամբ չի ներծծվել, ավելացնում ենք քրքումը (գույնի համար):

Անջատում ենք կրակն ու թողնում, որ բրինձը մի փոքր սառչի:

Ավելացնում ենք սենյակային ջերմաստիճանի կարագն ու քերած պարմեզանը:

Հարում ենք մեկ ձուն  և ավելացնում բրնձի զանգվածի հետ, լավ խառնում:

Թաց ձեռքերով վերցնում ենք մի բուռ բրինձ, մատով անցք են անում և դնում փոքր կտոր մոցարելլա: Բրնձին գնդի ձև ենք տալիս:

Ստացված գնդիկը նախ թաթախում ենք ալյուրի մեջ, հետո հարած ձվի մեջ, ինչից հետո՝ պաքսիմատի:

Բուսայուղով կաթսայի մեջ լավ տաքացնում ենք և տապակում ենք արանչինին 4 րոպեի ընթացքում՝ մինչ ոսկեգույն դառնալը:

Արանչինին կարելի է մատուցել Մարինարա տաք սոուսով, որի բաղադրատոմսով արդեն կիսվել էի:

Ամենայն բարիք և բարի ախորժակ

Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:  

Այլ բաղադրատոմսերի համար անցեք հղումով:

Ինչպես նաև հետևեք մեզ Facebook-ում և Instagram-ում