Ապուր չխրթմա վրացական ձևով

Ապուր չխրթմա վրացական ձևով

Ողջույն ընկերներ

Այսօր պատրաստելու ենք շատ համեղ վրացական ապուր՝ չխրթմա:

Հրաշալի ապուր՝ համեղ, յուղալի և շատ անուշաբույր ու, կարևորը, հեշտ պատրաստվող: Ապուրը, իմիջայլոց, նաև խումհարի դեմ հրաշալի միջոց է ☺️

Բաղադրությունը

Յուղոտ հավ

Սոխ - 1 մեծ գլուխ

Ձու – 5 հատ

Ալյուր – 1 լիքը ճ. գդ.

Համեմ – 1 կապ

Քացախ 9% - 1 ճ. գդ.

Չորացրած անանուխ – 1 պտղունց

Աղ՝ ըստ ճաշակի

Ապուր չխրթմա վրացական ձևով

Պատրաստման եղանակը

Լվանում ենք հավը, կտրատում, դնում կաթսայի մեջ, վրան սառը ջուր լցնում և դնում եփվելու՝ պարբերաբար հեռացնելով փրփուրը: Վերջում համեմում ենք աղով և մի կողմ դնում:

Պատրաստի արգանակից վերցնում ենք 2 բաժակ, լցնում թասի մեջ և դնում սառչելու:

Շատ մանր խորանարդներով կտրատում ենք սոխն ու լցնում մեկ այլ կաթսայի մեջ, որում եփելու ենք ապուրը:

Ճաշի գդալով զգուշությամբ արգանակի յուղը (ինչքան կլինի) լցնում ենք սոխի վրա և մարմանդ եփում թույլ կրակին 5-6 րոպե. սոխը պետք է փափկի, բայց իր գույնը չփոխի:

Ոչ մի դեպքում չի կարելի այն տապակել:

Արգանակը մաղի միջով անցկացնելով լցնում ենք սոխի վրա:

Լցնում ենք ալյուրը մեծ բաժակի կամ ափսեի մեջ, վրան ավելացնում սառած արգանակից 0.5 բաժակ և վենչիկով լավ հարում, որպեսզի գնդիկներ չլինեն:

Այնուհետև ստացված զանգվածը լցնում ենք կաթսայի մեջ և եռացնում՝ անընդհատ խառնելով:

Առանձին թասի մեջ կոտրում ենք ձուն, ավելացնում մանրացված համեմը, քացախը և քիչ-քիչ ավելացնում մնացած սառած արգանակին՝ այդ ընթացքում անընդհատ խառնելով, որպեսզի ձուն չկտրվի:

Ապուր չխրթմա վրացական ձևով

Այս զանգվածը կրկին լցնում ենք կաթսայի մեջ, հասցնում եռման աստիճանի, բայց ոչ մի դեպքում չենք եռացնում:

Ապուրին ավելացնում հավի կտորները, անհրաժեշտության դեպքում կրկին համեմում աղով, ավելացնում ենք չորացրած անանուխն ու վերջ:

Ապուրը պատրաստ է, կարող եք վայելել:

Ամենայն բարիք և բարի ախորժակ

Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:  

Այլ բաղադրատոմսերի համար անցեք հղումով:

Ինչպես նաև հետևեք մեզ Facebook-ում և Instagram-ում