Աղանդեր՝ ելակով և Սավոյարդի թխվածքաբլիթով

Ողջույն ընկերներ

Ես այսօր անսպասելի իմացա, որ երեկոյան հյուրեր եմ ունենալու: Որոշեցի տեսնեմ՝ ինչ կա տանը և ինչ կարող եմ դրանից մոգոնել 😉

Պարզվեց, որ տանը Սավոյարդի թխվածխաբլիթ, սերուցք և կաթնաշոռ ունեմ:

Այսքանը բավական է ա-լյա տիրամիսու աղանդերի համար, սակայն լիարժեք երջանկության համար պակասում են հատապտուղները:☺️

Պետք է արագ գնալ ելակի հետևից:

Այսպիսով՝

Բաղադրատոմսը՝

Ելակ - 1 կգ

Սավոյարդի/ Savoiardi թխվածքաբլիթներ - 24 ձողիկ

Սերուցք 33% - 300 մլ

Կաթնաշոռ - 500 գր.

Կոնյակ - 2 ճ. գդ.

Շաքարավազի փոշի - 180 գր.

Ժելատին - 1 ոչ լիքը թ. գդ. (պարտադիր չէ)

Պատրաստման եղանակը.

Բլենդերով հարեք կաթնաշոռը կամ այն անցկացրեք մաղի միջով՝ միատարր զանգված ստանալու համար:

Սերուցքն ու շաքարավազի փոշու հարիչով հարեք, ավելացրեք կաթնաշոռն ու մի փոքր էլ հարիչով խառնեք (5-6 վրկ.):

Ավելացրեք ժելատինը, եթե ցանկանում եք՝ զանգվածն ավելի ձիգ լինի:

Դրա համար պետք է ժելատինի վրա լցնել եռացրած, բայց անպայման սառեցրած ջուր (մոտ 80 գր.) և թողնել, որ այն ուռչի 20-25 րոպե: Այնուհետև պետք է այն տաքացնել թույլ կրակի վրա, բայց ուշադիր եղեք, որ ժելատինը չեռա, թե չէ այն կկորցնի իր գելային հատկությունները:

 Վերջ, ավելացրեք ժելատինն արդեն պատրաստի կաթնաշոռային մուսին:

 

Աղանդեր՝ ելակով և Սավոյարդի թխվածքաբլիթով

 

Կես կգ ելակը մաքրեք պոչերից և 2 ճ. գդ շաքարավազի փոշու հետ հարեք բլենդերում: Ստացված զանգվածից վերցրեք մի քանի ճ. գդ.:

Մնացածը ավելացրեք կաթնաշոռային զանգվածին և խառնեք:

Առանձնացրած մի քանի ճ. գդ. Հարած ելակին ավելացնում ենք կոնյակն ու 100 մլ եռացրած-գոլացրած ջուր:

Վերցնում ենք ուղղանկյուն կամ քառակուսի ֆորման: Ինձ մոտ 24-ը 24-ի վրա ապակյա ֆորմա է:

Թաթախում ենք Սավոյարդին ելակա-կոնյակային հյութի մեջ և առաջին շերտով դասավորում ենք թխվածքաբլիթները մեր ֆորմայի հատակին: Դրանք շարում ենք մաքսիմալ մոտ:

Վրան լցնում ենք կաթնաշոռային զանգվածի ուղիղ կեսը, իսկ դրա վրա՝ կտրատված թարմ ելակի առաջին շերտը:  Այնուհետև կրկին դասավորում ենք թխվածքաբլիքները նույն եղանակով, վրան լցնում մնացած կաթնաշոռային զանգվածը և զարդարում թարմ ելակով:

Եվ վերջ:

Ձեզ մնում է մեկ գավաթ սուրճ կամ թեյ պատրաստել ու վայելել:

 

Բաղադրատոմսը կարող եք Save անել՝ սեղմելով վերնագրի ներքևում գտնվող կոճակը:  

Այլ բաղադրատոմսերի համար անցեք հղումով:

Ինչպես նաև հետևեք մեզ Facebook-ում և Instagram-ում

  Բարի ախորժակ